بنتي طفشت
بنتي طفشت من البيت من شهرين وحفيت علمالقيتها قاعدة عند واحدة صحبتها بتشتغل معاها في كافيريا رحتلها الشغل كذا مرة وراضيتها وطيبت خاطرها وبرضو رفضت ترجع … وهددت بأنها حتسيب الشغل والسكن وتروح حته محدش يعرفها فيها
استنيت وردية صاحبتها واتحيلت عليها تعقلها قالت لي مفيش فايدة ياحاج اعتبر بنتك ماتت وخلي مراتك تنفعك
انا عجزت وصاحب مرض وعلى باب الله وعندي كوم لحم ومش عارف أعمل آيه
مراتي قالت أبعتلك عشان كانت بتشوف بنتي بتقرى المشاكل في صفحتك فاعمل معروف ساعدنا
يمكن تسمع كلامك وتحن لخوتها وبلاش.. أبوها ومرات ابوها…تحن لخوتها الغلابة
أخي الكريم
أعانك الله ورد إليك بنتك وأصلح حالكم
ما سبب ترك بنتك البيت أولاً ؟ وياريت اعرف ظروفكم وما حدث بينكم وأيضاً ضروري أسمع من أبنتك
واعرف تفاصيل أكثر عن المشاكل التي تعيشونها
وعلى اي حال إذا كان الأمر كما أخبرت زوجتك من أن أبنتك تتابع صفحتي هذه
فهذه رسالة إلى أبنتي لعلها مازالت تتابع الصفحة
أبنتي آمل (إن كنت ترغبين ) في مراسلتي وإطلاعي على أسباب تركك لبيت أبيك ووجهة نظرك
لربما يكون لديك مبررات معتبرة لخروجك من البيت
ولربما وضع أسرتك يحتاج منك تفكير ؟
في انتظار الرد
ورد الى الصفحة هذا الرد بعد أكثر من أسبوع من النشر

أنـا الـبـنـت الـلي طـفـشـت
أنا سبت البيت بعد ما خلاص جبت أخري وعشان ما تفكرنيش وحشة أنا حقولك حاجة بسيطة من اللي شفته من أبويه ومراته
هي كانت عاوزه تضيعني وتسرحني بس ربنا نجاني ورزقني بولاد الحلال شغلوني في مصنع راجل طيب بتاع ربنا لما عرف حكايتي طلع مساعدة شهرية لخواتي غير مرتبي وكانت بتصرفها على البس الوسخ والكوافير والمزاج هي وأبويه
وصعب عليا خواتي اللي الراجل مطلع لهم المساعدة فدخلت قولت له ينفع يا عم الحاج تبدل الفلوس بخزين فقالي جدعة يا بت وعاقلة
وعطانا خزين طبعا قلبوا عليا وقلبوني رغم كنت بدفع في البيت وربنا
والولية (مرات أبويه ) كانت بتبيع الخزين وتسيب العيال يلقطوا رزقهم في الحارة واتخنقت معاها وأخرتها وزت ابويا يبلغ عن الراجل الطيب وجت الحكومة بهدلة الدنيا وشمعت الورشة وأخدت الراجل وسرحت الصنيعية ومن يومها مش طايقة أبص في خلقهم
وربنا فرجها علي بشغل وسكن وربنا يسهل ومش حسيب خواتي بس ظروفي تتحسن ومش راجعه ثاني ابدا ومحدش له حاجة عندي

أبنتي الكريمة
جزاك الله خيراً على ردك و تجاوبك ويبدو أنك فعلا ً تتابعين الصفحة
أبنتي الكريمة
إن كان ما كتبتيه فعلا واقعاً وكنت في عملك تحافظين على دينك وعرضك وتكسبين قوتك بالحلال وتنوين مساعدة أخوتك (وليس فرضاً عليك )
فابق كما أنت ولكن أحسني إلى والدك ( وبالوالدين إحساناً ) ولا تتجاوزي معه وحسابه على ربه
وحافظي على الصلاة والدعاء لك ولوالديك وأخوتك و إن استطعتي تقديم مساعدة لوالدك وأخوتك فبادري وسيخلف الله عليك ويزيد في رزقك –
<بشرط أن تكون المساعدة عينية (خزين ملابس دواء و.. ولا تكون نقود ..)

0 ردود

اترك رداً

Want to join the discussion?
Feel free to contribute!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *